សុំចាប់ខ្លួន អតីត​ឧកញ៉ា ហ៊ី គឹមហុង និងបក្ខពួក ព្រមទាំងឱ្យសងលុយវិញ!!! នេះជាសម្រែកពលរដ្ឋរងគ្រោះរាប់រយនាក់ ផ្ទុះការតវ៉ាទ្រង់ទ្រាយធំ នៅមុខតុលាការ

ភ្នំពេញ៖ ប្រជាពលរដ្ឋរងគ្រោះរាប់រយនាក់ដែលចាញ់បោក ក្រុមហ៊ុនពិភពដីមាស  របស់អតីត​ឧកញ៉ា ហ៊ី គឹមហុង ដោយសារការវិនិយោគ ដាក់លុយទិញដី ដើម្បីទទួលបានការប្រាក់ខ្ពស់ ប៉ុន្តែពលរដ្ឋមិនទទួលបានការប្រាក់ដូចកិច្ចសន្យាឡើយ បានផ្ទុះការតវ៉ាទ្រង់ទ្រាយធំសាជាថ្មី ឈានទៅបិទផ្លូវនៅមុខសាលាដំបូងរាជធានីភ្នំពេញ ស្ថិតក្នុងភូមិសាស្ត្រខណ្ឌជ្រោយចង្វា នាព្រឹកថ្ងៃទី២៤ ខែវិច្ឆិកា ឆ្នាំ២០២៥នេះ។

សូមជម្រាបថា កាលពីកឆ្នាំ២០២៣ អតីត​ឧកញ៉ា ហ៊ី គឹមហុង ប្រធានក្រុមហ៊ុនពិភពដីមាស​ ត្រូវ​បាន​ចាប់ឃុំខ្លួន​ប្រមាណ៤ខែ ហើយត្រូវបាន​ដោះ​លែង​វិញ បន្ទាប់​ជន​រង​គ្រោះមួយចំនួន​ផ្តិត​មេ​ដៃ ដើម្បី​បាន​នៅ​ក្រៅ​ឃុំ​រក​លុយ​សង​ពលរដ្ឋ​វិញ តែមកទល់ពេលនេះ អតីត​ឧកញ៉ារូបនោះ ​មិន​បាន​គោរព​តាមការ​​សន្យារកលុយសង​ពលរដ្ឋនោះទេ ចេះតែសន្យាខ្យល់អូសបន្លាយពេលជាបន្តបន្ទាប់ ទើបផ្ទុះការតវ៉ាទ្រង់ទ្រាយធំនេះជាថ្មី។

សូមរំលឹកថា ដោយសារតែវិបត្តហិរញ្ញវត្ថុដែលបង្កដោយ ក្រុមហ៊ុនពិភពដីមាស  របស់អតីត​ឧកញ៉ា ហ៊ី គឹមហុង នេះ បានបណ្តាលឱ្យប្រជាពលរដ្ឋរងគ្រោះ ឈឺចិត្តធ្លាក់ខ្លួនឈឺ និងធ្វើអត្តឃាតស្លាប់អស់ប្រមាណ៣០នាក់ និងមួយចំនួនទៀតបែកបាក់និរាសព្រាត់ប្រាស់គ្រួសារ ជាប់បំណុលវ័ណ្ឌក។

ពលរដ្ឋរងគ្រោះ តវ៉ាស្នើសុំសាលាដំបូងរាជធានីភ្នំពេញ ចេញដីការចាប់ខ្លួន អតីត​ឧកញ៉ា ហ៊ី គឹមហុង និងបក្ខពួក និងឆាប់ពន្លឿនការដោះស្រាយរកយុត្តិធម៌ជូនពួកគាត់ បានលុយសងធនាគារ ដោះបំណុលផ្សេងៗ និងផ្គត់ផ្គង់ការស់នៅចិញ្ចឹមជីវិតបន្ត។

សូមជម្រាបថា ក្រោយផ្ទុះការតវ៉ាព្រឹកនេះ គេឃើញមានវត្តមានអាជ្ញាធរខណ្ឌជ្រោយចង្វារ និង លោក ទិត សុទ្ធីបូរ៉ាឆាត អនុប្រធានសាលាដំបូងរាជធានីភ្នំពេញ ជាតំណាងឯកឧត្តមប្រធានសាលាដំបូងរាជធានីភ្នំពេញ បានចេញមុខមកជួបជាមួយប្រជាពលរដ្ឋ ទទួលយកសំណូមពរ និងបានសន្យាដោះស្រាយស្វែងរកយុត្តិធម៌ចំពោះសំណូមពររបស់ប្រជាពលរដ្ឋរងគ្រោះ ក្នុងរយៈពេល យ៉ាងយូរ២សប្តាហ៍ទៀត។